Наьсарен яхархочоа, «Нахацара къамаьл» долаш дехар даьчул тӀехьагӀа, квартира елар
Наьсаре яхача Малсаганаькъан Ӏайнас, «Нахацара къамаьл» яха передача дӀахьош, ГӀалгӀайчен кулгалхочунга Келаматанаькъан Махьмуд-Ӏаьлага дехар дир ший вахара хаттар кхоачашде, аьнна. Ше ха яха хиларах, ийслагӀча гӀата тӀа яха чӀоагӀа хала дар цунна.
«Из я СВО доакъашхочун нана, вай Даьхе лораеш ший вахар Ӏодиллар цун воӀа. 50 шера къахьийгад Къоасама Ӏайнас наха эшаш болча дикача балха тӀа, гӀалгӀай мотт, литература хьехаш», - аьлар вахара бувзамашка гӀолла мехка кулгалхочо.
Белгалду, из чуяхаш дола цӀа хьалхагӀа тишденнарех лоархӀаш дар. Тишъеннача фусамашкара нах кердача фусамашка баха ховшабара йолча программах цун кхаьча фусам 9-ча гӀата тӀа яр. Ше ха яьнна саг хиларах цунна унзара хетар, могаш а яцар цу чу яха.
Цунца дувзаденна, Келаматанаькъан Махьмуд-Ӏаьлас декхар тӀадиллар, цу кхалсага дикагӀа хургйола фусам ле, аьнна. Из сиха кхоачаш а дир, кастлуш Малсаганаькъан Ӏайна хоза тоаяьча квартира чу пхелагӀча этажа тӀа яхаш хургья, чура цӀенче шозза йоккхагӀа а я хӀанз - 100 кв метр.
