Бахархошта довзийтар, доазонаш тоадара йолча проектех бух соццаш хьахиннар
ГӏалгӀайчен Шолжа кхален бахархошта гойтар, «Дика шахьара хьалаш хьакхоллар» яха федеральни проект кхоачашъеш даь балхаш, яхаш, дийцар «Сердало» газетага цигарча администраце.
«Шолжа кхален доал деча даькъ тӀа, 2019 шергара 2023 шерга кхаччалца, 50 миллион сома проекташ кхоачашъяьй.
Цу тайпара, юрташка Алхасте, Берда-Юрта, Арште хьалъяьй кхоъ зӀамига-футбола майдаш, юкъара мах 13,5 млн сом, гонахьара доазув а тоадаьд. Иштта юкъарча моттигашка, Эбарга-Юрта, Гӏажарий-Юрта, Алхасте, Галашка, Берда-Юрта машинаш дӀаоттаяра йола моттигаш, гӀашлой лела наькъаш даьд, гӀандаш, нувхаш чукхувса аьшка яьшкаш оттаяьй, гонахьара доазув баьццардерзадаьд», - йоах хоамо.
Из боккха, дика болх тахан мехка массайолча шахьарашка, юрташка дӀахьош ба. Цудухьа цунца цхьана бахархой вахара хьалаш тоадар а дегӀадоагӀаш латт.
