Паччахьалкхен, моттигера совгӏаташ луш белгалвир мехкара 74 саг
Мехка хьал тоадара тӏехьа хьинаре къахьегаш хьабоагӏа болхлой совгӏаташца белгалбеш, кхетаче хилар тахан вай республике. Керда шу хьатӏадоагӏаш, 74 паччахьалкхен, моттигера совгӏаташ дар шоай декхараш боаггӏача боараме кхоачашдеш болча болхлошта деннараш.
Тайп-тайпарча моттигашкара нах бар цу юкъе: лораш, хьехархой, культуран оагӏонцара болхлой, спортсменаш, ахархой, гӏишлонхой, юристаш, иштта кхыбола къахьегамхой. Вай Мехкадас теркалдарах тарра, Даьхен гӏулакха бехктокхаме къахьегар, шоашта тӏадаьхка декхараш дизза кхоачашдеш хилар да уж берригаш вӏашкаозар.
Къаьстта йоккха терко йир «Даьй, ноаной сийле» яха орден еннача Пхьилекъонгий-Юртарча дезала. Мехка кулгалхочо белгалдир, дезал яхар вай къаман юкъе тхьоврарча хана денз эггара лоархӏамеча, лакхагӏча моттиге лаьттилга, воккхагӏчун сий дар, зӏамагӏчох къахетар, шийна тӏехьа сийрда лар йитар дезалера хьадолалуш долга.
Хӏара совгӏата хьалха дуккхача шерашка хьинаре къахьегар, кхувш латтарашта хоза масал гойтар латт. Иштта бехктокхаме шоай болх дӏахьош бола нах ба тахан мехка хӏама тоадеш, мах баь варгвоаца дикаш доаржадеш латтараш. Ший къам, Даьхе езар, коталонга кхоачавеш бола низ ба аьнна, Россе Президента, Путин Владимира аьнна дешаш хьадоаладир лоархӏамеча кхетаче.
Белгалбаьрий даьшта, ноаношта, дикача хӏаман тӏехьа цар оагӏув хьаллоацаш лаьттача гонахьарбарашта баркал аьлар Мехкадас, иштта къамах дог лазаш бола нах кхебарах. Аьттонца, иразе, беркатаца шоай никъ дӏахобахьа даькъалабийцар уж совгӏаташ дӏалуш.
