Федераце Совете Гӏалгӏайчен Парламента болх дӏабовзийташ хургва Хамченаькъан Белан
Мехкарча Халкъа Гуллама депутаташа хоржамаш дӏадихьа, РФ сенатора декхараш тӏадаьхкар Хамченаькъан Бахьаудина Белана. Белгалде деза, Хамченаькъан Белан парламента декхараш дукха хана денз дика довзаш волга.
Российски Парламента лакхерча палате вай республика дӏайовзийташ хьавоагӏа из, 2016-ча шера гуйран шоллагӏча бетта денз. Федераце Совете ахархой кхачан политиках, ӏалама гӏулакхех йолча Комитета кулгалхочун гӏонча волаш, къахьегаш ва из.
2026-ча шера ахкан тӏехьарча бетта, Россе Президента Амарца Даьхен гӏулакхашка белгалваларах, парламентаризм йоаржаеш хьинаре къахьегарах йола орден елар цунна.
Мехкарча Халкъа Гулламе къоастадаьчох дар, бокъонца доаггӏача тайпара РФ Федеральни Гуллама Федерацен Совете дӏадохьийтаргда, сенатора гӏулакх чӏоагӏдергдолаш.
