Бахархошкара 810 млн сом гаргга декхар хьагулдир «Къилбаседа Кавказа россеташа» 2023-ча шера
«Къилбаседа Кавказа россеташа - «Ингушэнергос» 2023-ча шера, 832 млн сом декхар токах хьа ца луш болчарна духьала каьхат чуделар. 812, 6 млн сомах латта 1, 4 эзар суда акташ тIаийцар, тока оагIон болхлой бакъбеш. Судо баьча соцамах, 785 млн сом декхар дIатокхаргда тайп-тайпарча балха моттигаша, 27 млн сом - бахача наха.
«ТIалатташ дола декхар хан-ханнахьа дIадаларга хьежжа мара тока моттигашка цхьацца кхоачамбоацараш юстардоахаш бола болх дIабахьа аьттув хилац болхлой. Цудухьа, шоай лоIаме ахча дIатела раьза боацарашца, суде гIолла дергда къамаьл. Вахарера цхьацца хIамаш бахьан долаш, ахча дIадала низ боацарашка ладувгIа кийча да тхо массахана. Токах пайда ийбеш, хIаьта ахча дIатела безам боацараша доккха зе ду тока оагIонна, берригача бахархошта», - дийцар тхога «Ингушэнергонна» кулгал деча ТIоаршхой Рамзана.
«Къилбаседа Кавказа россеташ» яхача моттиго хан-ханнахьа шоашта тIалатта декхар дIале яхаш кхайкарал ду нахага. Декхар ше-ше дIадалац, кхы а дукхагIа хьаIайна мара; цудухьа, шоашта а берригача тока болхлошта а хало ца еш, ахча дIатела! Тесса дита йиш ярех дац из гIулакх. Боккъал а хам беш хила оашош йоаеча тока.
«Къилбаседа Кавказа россеташ» яхача оагIон сайте йолча «Сердал Онлайн» яхача мобильни оагIонга гIолла, «Ший доалахьара кабинет» яхача сервисе гIолла дIадала йиш я токах дола декхар. Нагахьа санна шийна тIалатта деррига декхар дIатакха низ болаш из саг веце, шийна юхерча ток лоаттаеча даькъ тIа дIаваха, дIадувца деза цо ший хьал ма дарра.
