Гаьгенаькъан Руслана Гӏалгӏайчен Халкъа Гуллама бархӏлагӏча кхайкарала Совета хьалхара кхетаче дӏайихьар
Гӏалгӏайчен Халкъа Гуллама бархӏлагӏча кхайкарала Совета кулгалхочо Гаьгенаькъан Руслана хьалхара кхетаче дӏайихьар. Доакъашхоша дийцар хьалхарча йоккхача кхетаченга кийчо ярах, партийни фракцешта регистраци ярах.
Кхетаче дӏахьош дакъа лоацаш бар республикан Кулгалхочун администраце, Паччахьалкхен викалаш, Минюста урхалле, иштта фракцей, парламента комитетий кулгалхой.
Парламента болх вӏашагӏболлаш, хьакхеллар йиъ фракци. «Цаӏ йолча Россена» кулгал деш ва Аласханаькъан Мухьмад, цунна чувоагӏаш ва партийни оагӏонцара хержа 27 депутат. «Нийсхо йолча Россе» даькъ тӏара парламенте болх беш ва Оздой Руслан, Ӏарпенаькъан Ӏалихан. ЛДПР хьашташ лоаттадеш хургва Гаданаькъан Гелани, Хаматхананаькъан ӏийса. «Керда нах» яхача парте викал хургва Мутаӏаланаькъан Ӏумар.
Вице-спикер, дешара, культуран, хоамий политикан комитета кулгалхо йолча Хьаьшанаькъан Азас проекта юкъе ши хаттар хьалхадаьккхар: республикан дешара, ӏилман Министерствос баьча балхах дувцар, иштта Удмурте Госсовето РФ дешара Министрага Кравцов Сергейга даь кхайкарал. Цу тӏа дувц берашта тӏехьара тӏа кхетам балара йолча моттигашка болх беча хьехархошта пенсионни ӏалашо ярах.
Юртбоахама политиках, ӏалама таронаш лелаяра хаттарех йолча комитета кулгалхочо Гӏулой Руслана дийцар законаш хьакхолларах.
Гаьгенаькъан Руслана депутаташ тӏахьийхар дешара министрага ладувгӏара, цу даькъ тӏара хаттараш кхоачашдара. Цул совгӏа, цо тӏадиллар цу хаттарех йолча комитетий балха гуйранара сесси дӏахьош де лаьрхӏар белгалдар, иштта республикански законаш хьакхоллара хаттараш мишта латт хьажар. Къаьстта терко цо тӏаяхийтар, хьатӏадоагӏача шера республикан бюджета проект оттаеш хилара.
«Из мехка керттера каьхат да, цун керттера терко лоаттае еза. Из дош дувцаргда массахана депутатий, боахамий цхьана къамаьл долаш», - аьлар Гаьгенаькъан Руслана.
