Россе байракха Ди дездеш, бахархошка къамаьл дир вай Мехкадас
Россе Паччахьалкхен байракха Цӏай дездеш, бахархошка къамаьл дир вай мехкадас Келаматанаькъан Махьмуд-Ӏаьлас. Республикан Кулгалхочо белгалдир, боккхача мехка триколора истори хӏара сага лоархӏаме, Даьхенцара бувззам, безам чӏоагӏбеш долга.
«Из байракх лакха аййийя, паччахьалкхен цӏайш дезду вай, Даьхе лораеш латтараш белгалбу, мехкахой карагӏдаьннача дикаех дувц, мехка боккха лерхӏам бола керда моттигаш хьаелл, иштта тайп-тайпара кхетаченаш дӏаяхьа вӏашагӏадетталу.
Къаьстта лоархӏаме да из къонача тӏехьенна. Мехка истореца, культураца, кхоаненца дувзаденнараш геттара чӏоагӏа лораде деза ха я тахан латтар. Цунга хьежжа, къонабараш, из деррига хьалхадоахаш, ураоттабе декхарийла да вай. Даьхен хӏама лорадеш, яхь, сий яхача дешай маӏан довзаш; хила беза уж бера хана денз», - аьлар вай Мехкадас.
Российски Паччахьалкхенца геттара боккха лерхӏам болаш, массахана вӏаший барт, бувзам болаш, Даьхен гӏулакха ураотта кийча долаш хила деза вай дерригаш! Из доккха цӏай дездеш, берригаш иразе, беркатаца, могаш-маьрша болаш, дика гӏулакхаш доаржадеш баха даькъалабийцар мехкадас Келаматанаькъан Махьмуд-Ӏаьлас.
