Гӏалгӏайчен Кулгалхочо мах бир, республикан Халкъа Гуллама балха чаккхе еш
Гӏалгӏайчен Кулгалхочо Келаматанаькъан Махьмуд-Ӏаьлас чаккхе йир, республикан Халкъа Гуллама депутаташа баьча балха. Депутаташца ший вӏашагӏкхетар долаш, мехка кулгалхочо баркал аьлар парламента депутаташта, цар законаш хьакхоллаш баьча балхах, иштта лакха балха говзал цар хиларах.
«Республикан Парламента дика бувзам лелабаьб Паччахьалкхенца, цар цхьана дӏабихьар мехка ерригача ӏаьдала моттигашцара болх. Тӏаийцар дукха тайп-тайпара законаш. Мехка закона чудоагӏаш дар СВО доакъашхой, цар дезал хьаллацар. Из лоархӏаме да, хӏана аьлча вай бӏухой шоай вахар цига дӏадала кийча болаш, Даьхе лораеш, тӏема мугӏарашка латт», - аьлар республикан кулгалхочо Халкъа Гулламе къамаьл деш.
Гӏалгӏайчен Кулгалхочо белгалдир, парламента болх цхьана дӏахьош хиларах, таро хилар вахара-экономически оагӏорахьара республика дегӏайоалае, цун вахара хьалаш тоаде. Къамаьл чакхдоалаш, Келаматанаькъан Махьмуд-Ӏаьлас баркал аьлар Халкъа Гуллама кулгалхочунна Тӏумхой Мухьмада, иштта фракцей кулгалхошта, цар дика толамаш доахаш из болх цхьана дӏабахьарах.
Дӏахо балха совгӏаташ делар. Тӏумхой Мухьмада баркал аьлар Мехкадас депутатий болх иштта тӏаэцарах. Цо аьлар, хьатӏадоагӏа Россе Паччахьалкхен Думан, ГӏР Халкъа Гуллама ийслагӏча кхайкарала хоржамаш лакхача боарам тӏа дӏахьорг хиларах ше тешаш ва, аьнна.
