Хьажол де болхарий гӏулакхех дувцаш, кхетаче дӏайихьар вай Мехкадас
«Магас» яхача аэропортера хьажол де болхараш ийца, хьалхара фецара кемаш наькъа арадаьлар. Оттаяь ха лораеш, лакха терко лоаттаеш дӏахьош ба тахан из болх. Цу гӏулакхаца дувзаденнарех дувцаш, кхетаче дӏайихьар вай мехкадас Келаматанаькъан Махьмуд-Ӏаьлас.
«Цу гӏулакхацарча комитета, деррига оагӏонаш теркалдеш, дӏахьош ба из болх. Наькъий, машиний гӏулакхех йолча министерствос аэропорте дӏабуг хьажол де болхараш, хӏаьта ӏаьдала болхлой аэропортера кхерамзлен хьал лорадеш ба.
Таможне, доазонаш лорадеча оагӏонцара болхлой деррига боаггӏача боараме дӏагӏоргдолаш хьожаш ба. Вай мехкахошта, иштта вай аэропортера хьажол де болхарашта, новкъарле еш хӏама хила йиш яц. Цхьаккха кхоачамбоацар доацаш дӏачакхдаккха дезаш гӏулакх да из», - яздир вай Мехкадас ший Телеграм-оагӏон тӏа.
Хӏара тоабанца из болх дика бовзаш бола дийша нах, иштта лораш ба. Даьла параз кхоачашде арабаьннарашта де дезар хьалхадоаккхаш ба дийша нах, хӏаьта лораша цар могашала терко лоаттаю. Из доккха, лоархӏаме гӏулакх боаггӏача боараме чакхдаргдолаш, хьожаш ба вай мехка.
