Мехка доагор лоаттадара тӏахьожам беш ба моттигерча кабмине
Машинашта эшача доагора лакха терко лоаттаярах дувцаш кхетаче дӏайихьар тахан мехкарча премьер-министра Сластенин Владимира. Республикерча АЗС болх тахан мишта латташ ба, бензин, солярка цу моттигашка мел кхоачам болаш да, иштта малагӏча маьха тӏа латт дийцар кхетаче. Мехкарча ахархошта цхьаккха кхоачамбоацараш доацаш мел эш доагор лоаттаде дезилга белгалдир цига.
«Республикера хьал тахан ма дарра довзаш хила деза вай: карарча хана доагора кхоачам малагӏча боараме латт, хьачу мел дахьаш да, иштта доагор чудувтташ йола малагӏа моттигаш болх беш я. Кхоачамбоацараш долча моттигашкара бахьанаш тахка деза, уж юстардоахаш малагӏа болх дӏабахьа беза хьажа деза. УФАСаца, къаьстта терко еш, хьажа веза маьхашка. Боарам боацаш доагора мах айбар чакхдалийта йиш ярех дац. Юртбоахама, коммунальни моттигашта, иштта кхыдолча лоархӏамеча оагӏонашка эггара хьалха хилийта деза доагор. Из болх лертӏа хилийтар вай декхар да», - аьлар Сластенина.
Республике цу оагӏонца дувзаденнараш меттадоаладара тӏехьа лакха терко лоаттае езилга белгалдир кхетаче. Кабмина кулгалхочо тӏадиллар, республике хан-ханахьа эшаш дола доагор лоаттадергдолаш, боагӏаш бола болх дӏабахьар.
