Мехкада: «Хьалхарчар болам» яхача оагӏоно 50 эзар совгӏа бераш чулоац вай мехка
Тахан диъ шу дуз; РФ Президента «Хьалхарчар болам» яха берий, кагирхой Ерригача Россе юкъара паччахьалкхен болам хьакхоллаш Федеральни бокъо оттаяь. Дӏаяхача ханацарча ӏадаташта, таханарча деношта юкъера бувзам чӏоагӏбеш болх хилар цох. Боккхача мехкара миллионаш кагирхой, бераш да цу оагӏон юкъе дакъа лоацараш».
«Хьалхарчар болам» яха оагӏув дикка баржаш латт вай мехка. Таханарча дийнахьа цу юкъе 50 эзар совгӏа бераши, кагирхойи ба, иштта 6600 гаргга хьехамчаш. Республике хьайийлла 250 моттиг я карарча хана ишколашка, колледжашка, берий бешамашка. Даьхенцара безам чӏоагӏбарах йолча, гӏо лоаттадеча проекташка дакъа лоацараш ба цу юкъе.
Кхоллама, ӏилман оагӏонашца, спорте белгала бола, къаман пайдане хила ловш бола нах ба уж. Доккха баркал ала лов сона республикерча Оагӏон хьалха латтача Албохчанаькъан Маринайна, хьехамчашта, даьшта, ноаношта, хьехархошта, боккха болх дӏахьош къахьегарах. Тахан шуга гӏолла боккхача наькъ тӏа баьнна, майрра гӏа баккха, шоай начӏал доаржаде аьттув болаш хургба вай къонабараш», - язду вай мехкадас Келаматанаькъан Махьмуд-Ӏаьлас ший Телеграм-оагӏон тӏа.
Республикан кулгалхо дог тийша ва «Хьалхарчар болам» яхача оагӏон доакъашхоех вай республиканна, берригача мехка накъабаргбола говзанчаш, ӏилманхой, юкъарча оагӏон болхлой хургхиларах.
«Хьалхарчар болам» дукха хӏама чулоацаш оагӏув ба. ӏилмангара, технологешкара, экологегара, культурагара, дипломатегара, гӏо деш хиларгара ӏоволавенна 12 лоархӏамеча гӏулакха хӏама тоадеш бола болх ба цу оагӏонца дӏахьор. Ший говзал, начӏал доаржаде аьттув ба хӏара доакъашхочун. Дешархой, студенташ тоабанца болх дӏабахьа ӏомалуш, вахаре лорхӏаме йола проекташ йоаржаяра тӏехьа къахьега йиш йола моттиг я из.
