Тӏема тохкама оагӏон кулгалхошца, кхетаче хилар вай Мехкадаь
Юстице инарал-майор волча Васильев Дмитреца, Къулбехьерча тӏема оагӏон РФ СК тохкама моттига кулгалхочун декхараш кхоачашдеш волчунца, кхетаче дӏахьош хилар вай мехкада Келаматанаькъан Махьмуд-ӏаьла. Юстице инарал-полковник волча Корпусов Константина, Тохкама комитета кулгалхочун гӏончас, цу моттига кулгалхочо лаьрхӏа хиларах дӏахьош дар из вӏашагӏкхетар.
Кхетаче дийцар керттерча тӏема-тохкама моттигаца республикерча оагӏон болхлоша бувзам лоаттабарах. Бӏухой, тахан Украинерча тӏема операцена юкъе дакъа лоацачар, цар цӏагӏарча наьха бокъонаш лораяра тӏехьа кхоачашде дезараш белгалдир цига. Къаьстта терко еш дийцар ВСУ оагӏорахьарча зулама духьале лоаттаярах. Иштта дола гӏулакхаш гучадахара тӏехьа дӏакхахьа безача балхах, уж зуламаш лаьгӏдара, юхатохара тӏехьа юкъедаха дезарех дийцар гулбеннараша.
Тохкама комитета болхлошта баркал аьлар вай Мехкадас, шоай декхараш боаггӏача боараме лораде хьожаш къахьегарах. Республикан кулгалхочо теркалдир, иштта атта йоацача хана къахьегачар гӏулакха лакха мах оттабе боагӏилга, лерхӏам бе безилга.
