Алхастерча культуран болхлоша дешархошта наркотикий зуламах дийцар
Алхастерча юкъарча дешара ишколе-берий беша наркотикех хьадоала во довзийташ берашца къамаьл дир моттигерча культуран Цӏен болхлоша. Из кхетаче дӏахьош хилара маӏан дар, берашта наркотикаша деш дола зе мел доккха да довзийтар, уж воча хӏамах лорабар.
«Берашца къамаьл деш вар кхетаче дӏахьош хинна Загӏенаькъан Адам, цо дийцар вахаре ха дезача хӏамаех лаьца, иштта белгалдир шоай унахцӏено лорае езилга, моллагӏа ше лаьрхӏа гӏулакх дӏадахьара хьаькъал дӏакхоачаш хила безилга. Къаьстта терко тӏаяхийтар бокъонаш лораяра хаттара, дешархошта хьалхадаьккхар моллагӏа дола наркоманеца дувзаденна зулам а, зӏамига волча хана денз, саг бехктокхаме оттавеш, цун хургбола профессиональни никъ дӏакъовлаш долга. Цо иштта хьалхадаьккхар нийса вахар леладеш, дика дешаш, воча хӏамах лоралуш хиларо сийрдача кхоаненга бодача наькъ тӏа вугаш хилар», - аьлар «Сердало» газетага Алхастерча культуран Цӏен кулгалхочо Боканаькъан Заретхана.
Кхетаче чакхъяьлар, кхувш йоагӏача тӏехьенга кхайкарал дарца, шоаш лорабар, шоай кортамукъале хиларах доккхал дар, наркотикаш цалелаяр дийхар къонача ноахалга.
Алхастерча культуран Цӏен балха тоабо цу тайпара хьехама болх каст-каста дӏахьу. Уж хьож воча хӏамах лорабала, нийса вахар леладара дешархошта, кагирхошта новкъостал де.
