Единороссий XXӏӏӏ-ча съезде вай мехкарча викалашта хьалхаваьнна вахар Келаматанаькъан Махьмуд-Ӏаьла
«Цаӏ йолча Россе» XXӏӏӏ-ча съезде дакъа лоацаш ба вай мехкахой. Парте Лакхерча кхела доакъашхо вола вай мехкада Келаматанаькъан Махьмуд-Ӏаьла вар Москве болхарашта хьалхаваьнна хиннар. Партийни кхетаче керттера моттиг дӏалоацаш хилар кердаяьккхача Къаман программан хӏама чӏоагӏдар. ӏX-ча ккхайкаралла Паччахьалкхен Думан хоржамий керттера декхараш белгалдарал совгӏа, Россе вахара- экономически гӏулакхий балхаца боккха лерхӏам болаш каьхат да из.
«Бахархой дехараш теркалдеш, оттадяьй керда программа. Съезд йолаялале хьалха, боккха болх дӏабихьаб цу оагӏонца. Мехка ерригача моттигий бахархоша, лораша, хьехархоша, ахархоша, бизнесменаша, тӏема операце доакъашхоша «Партийни десанта» болх хьаллоацаш онлайн-платформага гӏолла дӏакхахьийтад шоай дехараш, шоашта хилча бакъахьа хетараш», - дийцар «Сердалога» «Цаӏ йолча Россе» моттигерча оагӏоно.
Кердадараш юкъедихьача Къаман программан лоархӏамедараш бахархой хьал аттача даккхарца, паччахьалкхен моттигаш лораярца, российски доазоний гӏулакх тоадарца дувзаденна да. Демографически политика къоастаеш, мехка лакха говзал йола къахьегамхой кийчбар, технологеца, нейросеташца дувзаденнараш, иштта культуран, ӏадатий хӏама хьаллацар да доккхача декхарех.
