Гӏалгӏайчен Парламент, моттигера «Роскадастр» шоайла бувзам лелабеш хургья
Халкъа Гуллама Председатела Гаьгенаькъан Руслана балхаца ювзаенна кхетаче хилар «Роскадастра ППК моттигерча филиала кулгалхочунца Доданаькъан Рукъетаца. Ший къамаьл дӏадолалуш, цо даькъалавийцар Халкъа Гуллама Председатель Гаьгенаькъан Руслан кердача балха моттигаца. Цо белгалдир, лакха балха говзал йолаш, кулгалдара начӏал долаш хиларо новкъостал дергда Гӏалгӏайче вахара-экономически дегӏайоалаяра. Из хоам «Сердало» газетага бир парламента зарбан болх лелабераша.
Вӏашагӏкхетара керттера дешаш дувзаденна дар лаьттан доалахьен гӏулакхашца. Кхетачен доакъашхоша дийцар паччахьалкхен кадастра йоазув леладарах, гӏалаташ юкъера дӏадахарах, кадастра болх тоабарах, къаьстта паччахьалкхен доалахьара моттигаш хьалъеча даькъ тӏа массайолча оагӏорахьара болх нийсбарах.
Цар лаьрхӏар боахамашта юкъера бувзам чӏоагӏбе. Парламента чуйоагӏача цу даькъ тӏарча комитеташа, моттигерча «Роскадастра» филиало цхьана лорадергда лаьтташ, боахамаш леладара законаш.
Доданаькъан Рукъета, Халкъа Гуллама спикера «Кадастровик» яха журнал делар. Цо наха довзийт кадастра гӏулакхаш леладара керттера дешаш. Ше из луш, цо белгалдир, журнала оагӏонаш тӏа кепа тох лоархӏамегӏа дола дешаш наха довзийташ, Гӏалгӏайчен бахархошта дукхагӏа дагадоахкаш дола хаттараш цу тӏа гойташ хиларах.
