Политолог волча Гращенков Ильяс мах оттабир, Гӏалгӏайчен Кулгалхочун политически лоархӏама
Политолога, моттигера политика дегӏаяра Центра кулгалхочо Гращенков Ильяс белгалду, Гӏалгӏайчен кулгалхо Келаматанаькъан Махьмуд-Ӏаьлан балха моттиг чӏоагӏлуш хилар. Губернаторий лоархӏамах АПЭКа баьча кердача хоамах, республикан кулгалхо белггала йолча моттиге латт, из 51-ча мугӏарера 43-ча мугӏаре кхаьчар (хӏанз из ва 36-ча мугӏаре - «Сердало» газет). Бархӏ лагӏа лакхваларо таро елар Мехкадаьна, регионашкарча политически даькъ тӏа чӏоагӏбенна ца латтача кулгалхошта юкъера лоархӏамеча наьха тоаба юкъе хила, язду Гращенков Ильяс. Къилбаседа Кавказа федеральни куран цу тайпара хувцамаш лоархӏаме да. СКФО кулгалхочун дика цӏи йоаккхаш хилар тийша да из наха дика вовзаш хиларал совгӏа, цун Москвацара бувзам лакхача боарам тӏа хиларах, цо регионера хьал лерттӏа тӏахьожам болаш леладарах, шийна федеральни центро хьалхашка оттадаь декхараш цун кхоачашде харах.
«Гӏалгӏайчен кулгалхочун таро хилар кӏезиг-кӏезига воалаш мехка халача хьалашкара аравала. Хӏанз хьалхарча аргӏагӏа латтараш инвестице проекташ, промышленность дегӏаяр, балха керда моттигаш хьакхоллар да. Лоархӏаме да политически оагӏув чӏоагӏа хилар а. Из хьажац дукха къамаьлаш дувцарца хӏаман кхоачам бе. Цун балха керттердар - паргӏатта дӏахьош бола административни болх.
Президентаца, премьер министраца хулача кхетаченаша, республикан керттера проекташ хьаллоацаш хиларо, из хьал дӏадодаш хиларо хьагойт цу тайпара вӏашагӏбелла болх нийса хилар. Федеральни центра гуш да из хьал денгара ди массаза дала тоалуш хилар, Гӏалгӏайчен кулгалхоша шоашта хьалхашка оттадеш дола декхараш дика кхоачашдеш хилар», - йоах политолога.
Бакъда, cийлен моттиг лакха яр, аьнна; дикача моттиге вар, аьнна, кхоачашхулаш дац моттигера деррига декхараш. Хӏаьта а Гращенков Ильяс белгалду керттердар - Келаматанаькъан Махьмуд-Ӏаьла политически хьала кулгалде ховш хилар, цудухьа Гӏалгӏайче а ший боарамах дегӏайоагӏаш латт.
Цхьайолча хана кулгалхочун керттера толам коталонца боаккхаш хилац, из гуш хул мохк дикача хьалашка баларца. Къаьстта из да тахан Келаматанаькъан Махьмуд-Ӏаьланна карагӏдаьннар.
