Мехкарча Халкъа Гуллама кулгалхочун дарже хержар Гаьгенаькъан Руслан
Магасе дӏайихьар Халкъа Гуллама кердача, бархӏлагӏча оагӏонцара кхетаче. Республикан хьалхашка латта лоархӏаме декхараш белгалдеш, къамаьл дир депутаташка вай мехкадас Келаматанаькъан Махьмуд-ӏаьлас. Халкъа Гуллама керда кулгалхо хержар цу дийнахьа. «Цаӏ йола Росси» яхача фракце доакъашхо Гаьгенаькъан Руслан хургва Халкъа Гуллама кулгал деш. «Хьалха хиннача балха тӏа дайзараш Халкъа Гулламе къахьегаш дикка накъадаргда, аьнна, хеташ ва со. Мехкарча Паччахьалкхенца бувзаме долаш, цхьана республикерча экономикан, бахархой вахара хьал тоадара тӏехьа къахьега деза. Вай мехкадас Келаматанаькъан Махьмуд-Ӏаьлас белгалдаь декхараш кхоачашдара тӏехьа боккха болх ба дӏабахьа безаш», - аьлар Гаьгенаькъан Руслана. Иштта цо баркал кхайкадир хоржамашка дакъа лоацаш, депутатий оагӏув хьаллаьцача бахархошта.
Вай Мехкадас теркалдир, парламента кердача тоабан юкъе из гӏулакх дикка довзараш санна, хӏетта къахьега болалуш бола къонабараш а болга.
Къаьстта терко еш дийцар республикан кулгалхочо цу юкъе тӏема операце доакъашхой хиларах. Россе Президента чӏоагӏонца юкъеяьккхача «Турпала никъ» яхача проекте хьалхабаьннараш юкъебахар цу тоабанна.
Мехкадас белгалдечох, тӏема аренашка Даьхен хӏама лорадеш лаьттарий тахан республикера лоархӏаме декхараш кхоачашде а хьинар, говзал хургья.
