Гӏалгӏайчен викало дакъа лаьцар, гӏо деча наьха федеральни кхетаче йолаш
Гӏалгӏайчен цӏера духьала къовсам лоаттабеча колледжа хьехархо, волонтерий балха доакъашхо Галай Асхьаб вай республикера викал санна дакъа лоацаш хилар, «Цаӏ йолча Россе» парте Керттерча исполнительни комитете вӏашагӏкхетар дӏахьоча. Цига дакъа лоацаш вар волонтёрий тоабан бӏаь викал. Уж бар, укх тӏеххьарча барайтта бетта федеральни боарам бола чоалхане хьал юстардоаккхаш хиннараш. Лоӏамхоша баьча балха чудоагӏаш дар ӏаржача форда тӏа нийсденна чоалхане хьал, Селий мехка догӏаш делхар бахьан долаш нийсденна хатар, иштта Курске, Белгородски областашка бахача наха гӏо дар.
«Цига дийцар «Цаӏ йолча Россе» волонтераш баьча балхах, царна юкъе яр чоалхане хьал нийсденна пхиъ моттиг, иштта «Курски доазон тӏа» дукхача бетташка баь болх.
Къаьстта дийцар дӏахо де дезачох. Оаха доаккхал ду Асхьаб цига шийгара дакъа юкъехьош, тхоай колледж иштта лакхача боараме гойташ хиларах.
Цо хьагойт шийгара дика масал гойташ, вай тӏехьенна кхетам бала безилга», - аьлар «Сердало» газетага цӏера духьалара къовсам лоаттабеча колледже.
«Цаӏ йолча Россе» кулгалхошца кхетаче йолаш, гойтар лоӏамхой экосистема дегӏайоалаяра хила еза оагӏонаш. Лоӏамхой балха даькъа юкъедаккха деза дешар, иштта хьакхолла еза чоалхане хьал юстардаккхара йола чӏоагӏа кӏийле; цу юкъе лораш, психологаш, юристаш а болаш.
Болам дегӏабоалабара юкъебаха лаьрхӏар лакха говзал йола волонтёраш; цул совгӏа, каст-каста из болх боаржабара дукхагӏа моттигерча наха юкъе къамаьл деш хила беза болама доакъашхой.
