Шин юртара тока хьал тоадеш я «Къилбаседа Кавказа россеташ»
МагӀалбика кхале, 6 Кв чулоацаш йола тока оагӀув тоаеш боахк, «Къилбаседа Кавказа россетий» вайцигарча филиала болхлой. Йоккхача, Юкъерча Ачалкхенашка ток лоаттаю оагӀув я из. Тишденна тока саьргаш дӀа а даьха, царна метта 13 км дикагӀдараш чудоахкаш латт болхлоша. Керда саьргаш токацара хатараш ца хилийтара, бокъо йоацаш царна дӀатӀахоттавала йиш ца хилара дикагӀа лоархӀаш да.
Цул совгӀа, оалхазарашта, хьайбашта кхераме дац уж, цӀи йоалаш, макх тӀаюжаш дац. 17 тока бӀоагӀа, 57 «пела» хувцаш болх дӀахьоргба къахьегамхоша. Цу юрташка бахача 4,2 эзар совгӀа болча бахархой хьал, кхаь ишколан, шин берий беша, цӀи яьлча оарцагӀъухарий моттига хьал аттачахьа доаккхаргда тока оагӀув тоаяро.
«Сай юртара хьал тохкаш оамал я са массахана. Тока болхлой къахьега эттача, сиха цига дӀаваха, царна эшаш дола гӀо де се кийча волга дӀахайтар аз, - дийцар Йоккхача Ачалкхе вахача Дзейтанаькъан Адама. - ЧӀоагӀа дега тоам хилар, цар балхага хьожаш. Шоай болх сабаре, боаггӀача боараме, бехктокхаме дӀахьош боахкаш, хам баь варгвоаца къахьегамхой ба уж. Гуш дар, шоаш леладеча хӀаманца цар лерхӀам болга, хӀаьта из эггара керттердар ма дий».
