«Даькъастен Россетий Гӏалгӏайчен керттера ЛЭП тоаеш я, лоаман йиъ юрта токаца ӏалашо яра

Технически балхаш дӏахьош ба, тишденна тока саьргаш хувцаш, республикан тока моттигашка, цу балхага дӏадода 595 млн сом ахча федеральни центро хьадайташ да.

ЛЭП ӏалашо еш я Шолжа кхален лоаман гаьнарча моттигашка ядача юрташта: Галашкенна, Мужеченна, Оалкамá, Даьттагӏенна. Цига вах 11,2 эзар саг, иштта цига болх беш я 18 вахаре лоархӏаме моттиг. Царна чуйоагӏаш я санаторен-хьун ишкол, Шолжа кхалера керттера дарбанче, хьайбашта хулача лазарашта дарба ду моттиг.

Даьттагӏе энергетикаша лаьрххӏа йола терко лоаттаю доазув да. Цу юртарча даькъ тӏара истори дӏадоладелар 1801 шера, цига я 100 совгӏа къаьнарча архитектуран, археологе Х-ХVӏӏӏ бӏаьшерений гӏишлош, царна юкъе я цӏихеза «Кхертӏой яьшка» оала, юкъерча бӏаьшерений Даьттагӏен кашамаш дола моттиг.

ЛЭП хувцара  чоалохане болх ба цига бе безар, моттиг хала хиларах. Из болх бийкъаб массехк даькъа. Хьалхарча аргӏагӏа говзанчаша  гобаьккха йола моттиг хьалъяьй 7,5 км: цига 63 аьшка бӏоагӏа оттабаьб, иштта 23,5 км саьргаш хийцад. Цо таро елар из моттиг Эса хи тӏара араяккха, хӏанз ЛЭП бӏоагӏашта хий тӏакхоачаргдац.

Шоллагӏча даькъа чудоагӏаш дола балхаш дӏадоладаьд. 7,4 бӏаьха никъ болча моттиге 23 км къаьна саьргаш хувца деза, цига 58 тока бӏоагӏа оттабе беза. Карарча хана 23 тока бӏоагӏа дӏаоттабаь баьннаб.

Тӏеххьара балха дакъа дӏадолалургда 2027 шера бӏаьсти. Лаьрххӏача ворхӏ километр йолча наькъ тӏа, болхлой тоабаша 35 тока бӏоагӏа, иштта 21,5 км саьргаш а хувцаргда. ЛЭП лораергья ди тохарах, геттара чӏоагӏа эттача йӏовхалах, цига  22 км ди тохара духьале еш дола саьргаш дохийтаргда.

Тока саьргий мугӏараш хувцаро таро лургья лакха пайда бола ток лоаттае, цунга дӏадодар кӏезигагӏа де, болхлой кхерамзле лорае, иштта Шолжа кхален лоаман йиъ юрта вахара лаьрхӏача моттигашта,  бахархошта тешшаме тока хьалаш лоаттаде.