2026-ча шера хоржамий кийчонна хетаяь кхетаче дӏахьош хилар Магасе сенатор Илезанаькъан Микаил
2026-ча шера хоржамий денгарча кийчон балхах дувцаш кхетаче дӏайихьар Магасе. «Цаӏ йолча Россе» моттигерча оагӏон секретарь, Федераце Кхела доакъашхо вола Илезанаькъан Микаил вар кхетачен кулгал деш хиннар.
«Кхетаче дакъа лоацаш бар «Цаӏ йолча Россе» республикан политсовета президиума доакъашхой, мехка моттигашкара кулгалхой, Халкъа Гуллама бархӏлагӏча кхайкарала юкъе депутатий хоржамашка дакъа лоацараш, иштта партена хьалхалаттараш.
Хьатӏадоагӏача хоржамашта боаггӏача боараме кийчо ярах, хоржамашка дакъа лацара бахархой тӏахьехарах, цу балха юкъе дакъа лоацаш мел бараш шоай декхараш дизза кхоачашдара тӏехьа къахьегаш хилар лоархӏаме долга дийцар кхетаче. Къаьстта терко еш хьоахадир кампане хӏара доакъашхочо ший гӏулакх бехктокхаме дӏадахьа дезилга, хоржамий балхах йолча бокъоно дӏадеххача тайпара деррига лораде дезилга», - йоах «Сердалога» «Цаӏ йолча Россе» моттигерча оагӏон зарбан болх лелабераша.
Илезанаькъан Микаила белгалдир, единороссаш хургдолча хоржамашта дикка кийчо яь, вӏаший бувзам болаш, цхьана болх дӏахьош хила безилга. Лоархӏаме моттиг дӏалоацаш ба цу юкъе бахархошцара болх.
Кхетаче йистейоалаш, цу оагӏонцара керттера декхараш эггара хьалхарча мугӏаре оттадеш, ше-ший аргӏагӏа дӏадахьа дезараш белгалдеш, Цаӏ долча хоржамий денга кийчо еча балхацара цхьаццадараш къоастадир парте викалаша.
