Экологех йолча онлайн-олимпиаде дакъа лаца аьттув ба вай дешархой
06.02.2024 13:45
«Экологи» яхача къаман проекто хьаллоацаш, Iалама гIулакхах йолча Россе министерствос, Учи.ру яхача дешара онлайн-платформо вIашагIъелла, ерригача Россе онлайн-олимпиада я таханарча дийнахьа денз дIайолалуш. Дакъа лоацараш ба; 1-ча, 9-ча классашкара дешархой. Из хоам «Сердало» газетага бир, Iалама гIулакхех йолча министерствон болхлоша.
ХьатIабоагIача бетта 4-ча денга кхаччалца хургйолча олимпиаде дакъа лаца йиш йолаш ба лакхе белгалъяьча классашкара моллагIа дешархой. Цу гIулакха «Учи.ру» яхача сайте хила веза из.
«Олимпиаде хургдолча хаттараша хьагойтаргда, малагIча боараме довз дешархошта Iаламца, экологеца, биологеца дувзаденнараш. Цул совгIа, Iалам лорадара тIехьа доаржаде дезараш довзаргда царна», - йоах тхогарча хоамо.
