Ловзаш йола тоабаш биъ бӀалах чакхъяла езаш яр. ХӀара бӀала тайп-тайпара хаттараш дар: лакхача моттигашка болх бе ка йоалаш хиларца, цӀи яларца, экологически Ӏалашо ярца, энергогӀишлой доазув лорадарца, могаш воацаш хьайзача сага хьалхара новкъостал дарца, лоравалара гӀирсаш леладе харца дувзаденна, кхыдараш.

Хьалхарча ловзара бӀала юкъе толашагӀйола моттиг яьккхар «Ингушэнерго» камандо.

«Ловзар дӀадахьара тӀехьа, цу тайпара тӀахьожам баро таро лу профессиональни кхетам миштаб ха, ший балха тӀа юкъахдуса кхоачамбоацараш дий ха, болх лерттӀа вӀашагӀболла, массайолча оагӀорахьара балха тӀа бехктокхаме хила, ший а гонахьарчар а могашал лорае. Керттердар - къахьегама бокъонаш лораеча ха дезар хьалхадаккхар», - аьлар котъяьннача тоабан тхьамадас, «Ингушэнерго» ток лоаттаеча моттигий филиала Наьсарен даькъ тӀара электроэнерги лелаеча инженера Хамхой Ӏаддал-Рашида.

Из болх вӀашагӀбелларашта хетачох, къаьстта профессиональни балха говзал миштай хьахайт ловзаро, дика новкъостал ду балха даькъ тӀа берригача болхлой могашал лораяра. Цудухьа цу тайпара кхетаченаш каст-каста дӀакхухь дукхагӀа болча болхлошта лаьрхӀа.