Гӏалгӏай мехка бах 79 къамий тоабаех бола нах
КИФ-2026 ше къамаьл деш, Гӏалгӏайчен Миннаца кулгалхочо Мизенаькъан Руслана дийцар, цхьан республикера масал гойташ, Россе юкъарлон барт, цхьоагӏо чӏоагӏдара дӏахьоча балхах.
«Бакъдар аьлча, сона из духхьал отчет хинна ӏацар, из дар хаттара луш дола жоп. Мишта даха деза мел йолча башхалонашца цаӏаш долаш? Цун луш дола жоп каьхаташка гӏолла хила дезаш дац, из да хӏара денна дӏахьоча балхаца. Вай каст-каста оал дукха къамаш дахача моттигах, из кхычарел тӏех хилар белгалдоаккхаш санна. Бакъда цун совле хилар гуш хул нагахьа санна цу лостамагӏа бу болх лерттӏа вӏашагӏбелла хуле. Гӏалгӏайче тахан 79 тайп-тайпарча къамий тоабаш ях. Из духхьал таьрахь хинна ӏац, из хӏара деннара бехктокхам ба», - аьлар цо.
Иштта министра ше къамаьл деш белгалдир ГӏР Кулгалхочун балхаца ювзаенна къамашта юкъерча гӏулакхех йола Кхел хилар, дика болх беш я 17 къаман-культуран тоаба, уж чуйоагӏаш я Гӏалгӏай Республикан «Россе къамий Ассамблейна». Цар дӏахьош бола болх моттийта беш бац, уж ерригаш а вахаре лоархӏамегӏа дола дакъа дӏалоацаш къахьегаш хьайоагӏа.
Иштта Миннаца кулгалхочо белгалдир, тахан республике шиъ паччахьалкхен мотт лелабеш хилар: гӏалгӏай, эрсий - цо ший аргӏагӏа дика толамаш доахийт культуран- дина, хьаькъала оагӏонга диллача кагирхой дегӏаахара даькъе.
«Оаха уж цӏаккха а цхьан хӏаманца нийсбац. Республикан Кулгалхочо оалаш цхьа нийса дешаш да: гӏалгӏай мотт- из къаман мотт ба, эрсий мотт - из хьаькъала тӏий да. Из духхьал деша хозала оалаш дац. Республикан ишколашка оаха дика дегӏабоалабу эрсий мотт дешара яхьашка, олимпиадашка, театра кхолламга гӏолла. Цун толам гуш ба: тха выпускникаш дикагӏча вузашка дешаш ба. Кагирхошта хоалуш да, шоаш укх боккхача мехка цхьа дакъа хилар, сога хаьттача из царна эггара лоархӏамегӏдар да», - аьлар Мизенаькъан Руслана.
