Гӏалгӏайчен Паччахьалкхено дийцар, мохк тов бетта хоржамаш дӏадахьа кийча хиларах
Гӏалгӏайчен Паччахьалкхен кулгалхочо Сластенин Владимира кулгал а деш, дийцар федеральнии моттигерчеи боараме хоржамаш дӏадахьарах дола хаттараш. Хоржамаш хургда кхаь дийнахьа - тов бетта 18-20 деношка. Моттигашка ӏалашо еш хургья республикера Хоржамий комисси, иштта ийс доазон, 142 даькъ тӏара хоржамаш ду моттигаш.
«Гӏалгӏайчен Хоржамий комиссена керте ва Йовлой Муса, цо белгалдир МВД, йоала болхлошца, тӏема урхалленашца, ЗАГСа моттигашца, доал дара доакъошца цхьана бувзам а болаш, харжархоех дола хоамаш чӏоагӏдеш да, аьнна. Къаьстта йола терко тӏайохийт хоржамий комиссе доакъашхой, администратораш кийчбара. Харжархошца болх дӏахьош ба, хоамаш довзийташ. Моттигерча телеканалашка, газеташка, Избиркома лаьрххӏача таронашка гӏолла кепа тох хоржамашта кийчо еш хиларах хоам беш йолча материала. Иштта болх беш я «бIайха бувзам» яха телефонаш, нах тӏаэцара а кийчо яьй», - аьлар «Сердало» газетага Гӏалгӏайчен Паччахьалкхен зарбан болх лелабераша.
Сластенина терко тӏаяхийтар, хоржамаш дӏадахьара йола ха тӏакхоачаш хилара. Цо белгалдир из лоархӏаме, бехктокхаме болх хилар.
Цо яхачох, хӏанз чӏоагӏа лоархӏаме да дикал лакха йолаш, массанахьа цхьоагӏо йолаш, кхерамзлен ӏалашо яь из болх чакхбаккхар, республикан бахархошка из хоам дика дӏакхачийтар.
Кхетаче чакхйоалаш, Сластенин Владимира бехктокхаме болча нахагара хьадийхар кхадж тоссача деношка ма хулла дикагӏа кийчо яь, чӏоагӏагӏа бехктокхаме хилар.
