Гӏалгӏайчен Паччахьалкхено дийцар Наьсарен 245 шу дизарга е езача кийчонах
Гӏалгӏайчен Паччахьалкхене кхетаче дӏайихьар, Наьсарен 245 шу дузаш хилара цӏайга кийчо ярах дувцаш. Из моттиг езъергья ардара бетта 16-17-ча ча деношка. Кхетаче дӏахьош вар республикан правительствон кулгалхо Сластенин Владимир.
Из дош дувцача дакъа лоацаш бар, из кхоачашдара бехктокхаме долча боахамий, министерствай викалаш, бокъонаш лораяра, сиха гӏо дара гӏулакхаш тӏара нах, доал деча даькъ тӏара, цхьанкхетарий кулгалхой.
Цӏай дездара программа, иштта карарча хана цунга кийчо яра хьал довзийтар, Гӏалгӏайчен культуран, туризма министра Лаьнанаькъан Залинас, Наьсарен администраце кулгалхочун гӏончас Алхастанаькъан Хаде. Кхетачен доакъашхоша техкар цӏай дӏахьу майдаш кийча хилар, концертий программаш вӏашагӏйохкар, транспорта, лорий гӏо дар, ха дара даькъ тӏара хьал миштад.
Кхетаче ма аллара, хьаьшашта лаьрхӏа концерта программаца хургья Гӏалгӏайчера, Даькъастен лоалахарча республикашкара кхоллама тоабаш, артисташ. Иштта цига хургда къаман даараш, халкъа кулгаговзала пхьоалле, говзанчий хьехамаш, моттигерча товараш арахецарий ярмарка.
Керттера майда хургья шахьара культуран Цӏа, ӏама юхера доазув, Малсаганаькъан Кӏарцхала цӏерагӏа парк. Юбилей йолаш хьаделларгда кердадаьха юкъара доазонаш. Бераш долча дезалашта вӏашагӏдохкаргда интерактивни доакъош, яхьаш, викторинаш, берашта лаьрхӏа программаш.
Къаьстта йола оагӏув хетаяь хургья шахьара исторена, цун бахархошта. Наьсархошта гойтаргья «Наьсаре сибаташца» яха проект, иштта шахьара дӏаяхача ханах дувцаш документальни фильм гойтаргда.
Сластенин Владимира белгалдир, из цӏай дика дӏадахьара берригача гӏулакхерча наьха дика вӏашагӏбелла болх хила беза. Цо яхачох, из болх вӏашагӏболлара хаттараш хьалххе а кхоачашде деза, цӏай лакхача боарам тӏа дӏахьоргдолаш, шахьара бахархой, хьаьший самукъадоаккхаш.
