Къаман проектий балхах дувцаш, кхетаче дӏайихьар мехка Надыкто Владимира
Россе Президента СКФО викала гӏонча волча Надыкто Владимира кулгал деш, кхетаче хилар вай мехка. Кхетачен доакъашхоша дийцар къаман проекташ йоаржаяра болх тахан мехка малагӏча боараме латт. Вай мехка кхаьчача хьакима республикера болх чакхбоалаш йола кхетаче хилар цох.
«Республике боккха болх дӏахьош, тоаеш латтача моттигашка гӏолла гобоаккхаш хилар хьаким. Цу юкъе я Гӏажарий-Юртара берий беш, Алхастера культуран цӏа, «Сурхотӏе-Алхасте» яха машиний никъ, Сурхо тӏара ветераний цӏа, ӏаьлий-Юртара дарбанче, Наьсарера парк, ӏарпенаькъан Ювсапа цӏерах йола политехнически колледж. Лоархӏамеча кхетаче вӏашагӏкхийттараша дийцар унахцӏенон, гӏишлошъяра, туризма, культуран, дешара, экологе, наькъий оагӏонашцара хӏама тоадеш йолча къаман проектий балхах. Паччахьалкхен программаш йоаржаяр тахан боаггӏача боараме, лакхерча хьакимаша тӏадиллача тайпара хургдолаш, кхоачашде дезарех, из болх дикка хьаллоацаш къахьегарах дийцар кхетаче гулбеннача хьакимаша», - йоах «Сердалога» мехкарча паччахьалкхера бенача хоамо.
Къаман проекташта лаьрхӏа укх шера вай республиканна хьахьожадаьр 5,7 миллиард сом ахча да, цу юкъерча 5,4 миллиард сома ахчанцара хӏама чӏоагӏдаь даьннад, 3,5 миллиард сомах болх дӏабихьаб, берригача боарам тӏара дӏалаьрхӏача 62%-га кхоачаш хул из.
РФ Президента СКФО викала гӏонча волча Надыкто Владимира белгалдир, къаман проекташ йоаржаяр гӏишлошъяра балхех йолча моттигерча министерствон декхарех хинна ца ӏелга. Хьакима теркалдир, из болх массайолча министерствоша, проектни моттигаша, бе-беча оагӏоний кулгалхоша цхьана дӏабахьа безаш хилар.
Иштта белгалдир, цу оагӏонцара болх лерттӏа хьаоттабара тӏахьожам чӏоагӏбе безилга, моллагӏа тешаме ца хета хӏама ханнахьа юстардаккха, балха чаккхе юххьанца дийцача тайпара хила езилга.
